এসাদে এসাদেতে আপাঙ আগ আছিলতা। আপাঙর মালকে আকদিনতে আপাঙ এগরে গালেয়া মাতিরি— আপাঙ, ঘরে বয়া বয়া ডিগালি বন আগাছ পাথারি নাকরিয়া ইমে লাহুলাত সময় এতা মাংকরর! যাগা ঔরে লপুকে ধানহানাত পড়িয়া খুটেইতারাগা পাহিয়া-পলি ঔতা খেদগা, ঔহানৌতে কানার কাম আহান অইবতা । মালকর গালি এতা হুনিয়া আপাঙ এগ সৌয়য়া ফিঙ ফিঙ করিয়া লাঠি আগল লপুকে ধানহান রাহাত গেলগাতা। লপুকগর খামতলে টেঙারাগর কাদা ঔহানাদে আপাঙর মালকে মানু লাগেয়া ‘কালি মেকুরি’ ধান খেতি করেছেতা। আপাঙ এগইতে ধান নাচিনেরহান থকয়াতে কালা কালা ধান এতা দেহিয়া পক পড়েছিতা পাউরি নিংকরিয়া আনেছে লাঠি ঔগল আকমুরেদরেত্ত বারানি অকরল। এসাদে করে বারেয়া ধান ঔতা হাবি তেঙকরে জঙেয়া বেলেয়া হদেয়া ঘাম ঘাম সৌয়য়া গিয়া মালকরে বাগেইলগা, ধানহানাত পড়েছিলা কালা কালা পক ঔতা হাবি বারেয়া খেদিয়া আইলু। মালকে হুনিয়াই হারপেইল গিরকে কিসাদে কাণ্ড আহান করিয়া আহিল পাউরি। ইরাইরি গিয়া চেইতেগা হুত্তমেউ দেহিরিগা ধানহান হাবি বারেয়া জঙাদিয়া পরলেই করেদেছে। সৌয়য়া কান্থিহানল আলয়া আয়া আপাঙ এগরে পেলকরে ঠারেয়া গালেয়া মাতলগা— ঔতা পক নাগই, কালি-মেকুরি ধান,